चोखोबा ते तुकोबा - एक वारी समतेची २०२३ ,. मध्यवर्ती संयोजन समिती अध्यक्षपदी - ह भ प शिवाजीराव मोरे महाराज देहूकर

 

महाराष्ट्रातील ९  जिल्ह्यातून १७००  किलोमीटर वारीचा प्रवास राहणार असून, समता विचार सांगणारी चित्रफीत दाखविण्यात येणार आहे.

अहमदनगर ( प्रतिनीधी) 'चोखोबा ते तुकोबा - एक वारी समतेची' २०२३ , वर्षीच्या मध्यवर्ती संयोजन समिती अध्यक्षपदी - ह भ प शिवाजीराव मोरे महाराज देहूकर यांची निवड करण्यात आली आहे.  शिवाजी मोरे महाराज हे श्री विठ्ठल रुक्मिणी मंदिर समिती पंढरपूर चे विश्वस्त , संत तुकाराम महाराज देवस्थान देहू संस्थानचे माजी अध्यक्ष आहेत. वृक्षदाई संस्थेच्या माध्यमातून त्यांनी पर्यावरणाचा ऱ्हास रोखत  भंडारा ,भामचंद्र सह देहुगाव परीसरात वृक्ष संवर्धन कार्यास मोठी गती दिली आहे . मराठवाड्यात वृक्ष संवर्धन कार्य वाढायला हवे यासाठी प्रयत्नशील आहेत . तसेच महाराष्ट्र शासनाच्या पर्यटन व सांस्कृतिक कार्य विभागाच्या '  ज्ञानोबा तुकाराम ' पुरस्कार समितीचे ते विश्वस्त आहेत . 

संत चोखामेळा अध्यासन केंद्र व वृंदावन फाऊंडेशन आयोजित समता वारीचे हे पाचवे वर्षे असुन, रविवार १ जानेवारी २०२३ श्री संत चोखामेळा महाराज कर्मभूमी मंगळवेढा येथून निघून बुधवार १२ जानेवारी २०२३ रोजी जगद्गुरु संत तुकोबाराय जन्मभूमी देहुगाव येथे समारोप होणार आहे. ही वारी महाराष्ट्रातील सोलापूर, धाराशिव , बीड, संभाजीनगर , जालना ,बुलढाणा , नाशिक, नगर, पुणे या ९ जिल्ह्यातुन १७००  किलोमीटर प्रवास करणार आहे. समाजातील वाढत जाणारी दरी, विषमता, जातीयता, नक्षलवाद, दहशतवाद आदी विषयांवर जागृती करण्यात येणार आहे.वारकरी संतांनी सांगितलेल्या समता बंधुता व मानवता या विचारांचे दर्शन घडवणारी चित्रफीत दाखवण्यात येणार आहे . माणसा माणसातील वाढत चाललेली दरी कमी होउन  समाजात बंधुभाव वाढीस लागावा यासाठी व समता, मानवता व बंधुभावाचा विचार अधिकाधिक लोकांपर्यत पोहचण्यासाठी ही वारी निघत आहे.