सामाजिक, धार्मिक कार्यात कायम अग्रेसर : अशोक (बाबुशेठ) बोरा

 

व्यवसाय करतानाच सामाजिक बांधिलकी जपत विविध समाजपयोगी कार्य करणारे, धार्मिकता जपणारे, साधू संतांवर नितांत श्रध्दा असलेले नगरमधील अशोक (बाबुशेठ) बोरा यांचा वाढदिवस मंगळवार दि.18 जुलै रोजी साजरा होत आहे. बोरा हे सर्वांना आपलेसे करणारे हसतमुख व्यक्तीमत्व म्हणून परिचित आहेत. त्यांच्या वाढदिवसानिमित्त शुभेच्छापर लेख...
राष्ट्रसंत आचार्य सम्राट परमपूज्य आनंदऋषीजी म. सा., पूज्य आत्मयोगी आचार्य सम्राट प. पू. शिवमुनीची म. सा. यांच्यावर नितांत श्रध्दा असलेले अखिल भारतीय श्वेतांबर स्थानकवसी जैन कॉन्फरन्सच्या राष्ट्रीय प्रमुख मार्गदर्शक पदी विराजमान अशोक (बाबुशेठ) बोरा हे सामाजिक, धार्मिक, शैक्षणिक कार्यात नेहमीच सक्रिय असतात. देशपातळीवर कार्यरत असलेल्या जैन कॉन्फरन्सच्या माध्यमातून ते संपूर्ण भारतभर समाजासाठी भरीव योगदान देत आहेत. सन  1992 मध्ये अखिल भारतीय श्वेतांबर स्थानकवासी जैन कॉन्फरन्सचे राष्ट्रीय युवा अध्यक्ष म्हणून पाच वर्ष कार्यभार त्यांनी सांभाळला आहे. याकाळात त्यांनी त्यांनी धार्मिक व मानव सेवेच्या माध्यमातून राष्ट्रीय स्तरावर आपली वेगळी छाप सोडली होती. तसेच 1998 मध्ये त्यांची राष्ट्रीय उपाध्यक्ष म्हणून निवड झाली. सन 2016 मध्ये त्यांनी राष्ट्रीय अध्यक्षपदाची निवडणूक लढविली होती. त्यावेळेस देखील त्यांना संपूर्ण भारतातून अभूतपूर्व असा मोठा प्रतिसाद मिळाला. त्यांच्या धडाडीच्या कार्याची दखल घेत त्यांना राष्ट्रीय प्रमुख मार्गदर्शकपदी नेमण्यात आले आहे. जैन कॉन्फरन्सच्या संविधान संशोधन समितीच्या सदस्यपदीही त्यांची नियुक्ती झाली आहे. या माध्यमातूनही ते मोठे काम करीत आहेत.
नगर शहर हे जैन धर्मियांसाठी महत्वाचे तीर्थस्थळ आहे. आचार्यश्रींच्या पदस्पर्शाने पावन झालेल्या या भूमीत आपल्या स्वर्गीय मातोश्री सौ गुलाबबाई सिमरतमल बोरा यांनी केलेल्या संस्कारातून संतांच्या विचारांचा वारसा पुढे नेण्याचे काम बाबूशेठ अविरतपणे करीत असतात. युवावस्थेत सामाजिक कामाची आवड असल्याने त्यांनी जेसीज क्लबचे अध्यक्ष पद भूषविले तसेच १९८७ साली आचार्य सम्राट प.पू.आनंद ऋषीजी म. सा. यांचे दीक्षा अमृत महोत्सव करण्याची जबाबदारी मिळाल्याने सर्व सहकाऱ्यांच्या सोबतीने न भूतो ना भविष्यती असा दीक्षा अमृत महोत्सव पार पाडला. नगर अर्बन बँकेत देखील वाईस चेयरमैन पदी असताना त्यांनी आपला वेगळा ठसा उमटवला व सभासदांच्या प्रेमाच्या जोरावर सलग वीस वर्ष संचालक पद ही    भूषविले. पत्नी सौ.निर्मला यांच्याशी १९७२ साली विवाहबद्ध झालेपासूनच या सर्व कार्यात बाबूशेठ यांना त्यांची अखंड साथ लाभली आहे. एकत्र कुटुंब पध्दतीने आपल्या सर्व भावंडांना सोबत घेऊन आयुष्याच्या सुरवातीच्या काळात जेमतेम परिस्थितीतून त्यांनी कापड व्यवसायातून तसेच रियल एस्टेट डेव्हलपिंगचे व्यवसाय करत आपल्या परिवाराचा नाव लौकिक वाढवत मोठा वैभव निर्माण केला व पुढे त्यांच्या मुलांच्या सोबतीने सिमरतमल कुंदनमल ज्वेलर्स सुवर्णदालनाचा कारभार पाहतानाच त्यांनी परिवारालाही समाजकार्याचे धडे दिले आहेत. त्यांचे बंधू अजित बोरा हे सुध्दा सामाजिक कार्यात अग्रेसर असतात. अशोक (बाबुशेठ) बोरा यांचे चिरंजीव ईश्वर बोरा हे अर्बन बँकेचे संचालक असून पुतणे गौतम बोरा शहरातील रामदेव बाबा मंदिर चे विश्वस्त असून, विनीत बोरा हे सहकारमहर्षी सुवालालजी गुंदेचा जैन ओसवाल पतसंस्थेचे संचालक आहेत.
नगरमधील सर्वात जुन्या जैन वात्सल्य संस्थेच्या कार्यातही अशोक (बाबुशेठ) बोरा यांनी सातत्यपूर्ण योगदान दिले आहे. या संस्थेच्या माध्यमातून समाजातील गरजूंना दर महिन्याला किराणा देण्यात येतो. तसेच समाजातील नोकरी इच्छुक युवकांना रोजगार उपलब्ध करून देणे, स्वयंरोजगारासाठी आवश्यक ते सहकार्य करणे, शैक्षणिक मदत अशा अनेक कार्यात त्यांचा हिरीरीने सहभाग असतो. त्यामुळेच ते सर्वांना हक्काचे बाबूशेठ वाटतात.
नगरमध्ये येणाऱ्या साधूसाध्वीजींची सेवा करणे, त्यांचे भव्य दिव्य असे चातुर्मास नगर शहरात उत्कृष्टरित्या संपन्न करणे त्यांच्या विहारा दरम्यान आवश्यक ती सर्व व्यवस्था चोखपणे करणे या कामातही त्यांचा मोठा सहभाग असतो. साधूसंत हेच जीवन जगण्याचा खरा मार्ग दाखवतात. त्यांच्यामुळेच समाज एकसंघ राहतो, स्फूर्ती मिळते असे विचार मांडून बाबूशेठ बोरा कायम युवा वर्गाला विधायक कार्यासाठी मार्गदर्शन करून प्रोत्साहन देतात. त्यांना वाढदिवसानिमित्त मन:पूर्वक शुभेच्छा