अहमदनगर (प्रतिनिधी)राज्यातील सर्व कृषी विद्यापीठे व संलग्नित महाविद्यालयातील शिक्षकेतर कर्मचाऱ्यांचे महत्वाचे प्रश्न उच्च व तंत्रशिक्षण मंत्रालयाच्या स्तरावर गेल्या तीन वर्षांपासून प्रलंबित आहेत, याबाबत अनेक वेळा निवेदन, भेटी आणि बैठका होऊन सुद्धा शासनाच्या उदासीनतेमुळे हे प्रश्न सुटलेले नाहीत.
आश्वासित प्रगती योजनेचा रद्द झालेला शासन निर्णय पुनर्जीवित करण्यात यावा. कृषी विद्यापीठातील शिक्षकेतर कर्मचाऱ्यांना सातवा वेतन आयोग तात्काळ लागू करावा . सेवांतर्गत आश्वासित प्रगती योजनेअंतर्गत सातव्या वेतन आयोगाच्या शिफारशीनुसार १०-२०-३० वर्षाच्या सेवेनंतर तीन लाभांची सुधारित योजना उच्च व तंत्रशिक्षण संचालनालयाच्या अधिनस्त शिक्षकेतर कर्मचाऱ्यांना लागू करावी . सातव्या वेतन आयोगाची ५८ महिन्यांची थकबाकी अदा करावी. पाच दिवसांचा आठवडा इत्यादी मागण्यांची पूर्तता न झाल्यास महाराष्ट्र राज्य महाविद्यालयीन व विद्यापीठीय सेवक संयुक्त कृती समितीच्या ठरावानुसार सोमवार दिनांक 22 नोव्हेंबर 2021 रोजी लाक्षणिक संप करून या त्रिव्र आंदोलनाची सुरुवात करण्यात येईल. याबाबतचे लेखी निवेदन महाराष्ट्र राज्य अशासकीय महाविद्यालयीन शिक्षकेतर कर्मचारी संघटनेचे जिल्हाध्यक्ष श्री वैभव रोडी ,उपाध्यक्ष श्री बाळासाहेब इघे, सचिव श्री संतोष कानडे, देविदास थोरात यांनी पुणे विभागीय सहसंचालक मा. डॉ.किरणकुमार बोंदर यांना दिले आहे. सदरचे आंदोलन हे नाईलाजास्तव करण्यात येत असून शासनाने सातत्याने केलेल्या उपेक्षेमुळे हे शासनाने आमच्यावर लादलेले आंदोलन असल्याची भावना असल्याचे निवेदनात शेवटी म्हटले आहे .
Post a Comment